సూక్ష్మ , చిన్న , మధ్య తరహా పరిశ్రమల మంత్రిత్వ శాఖ 2022 ఏప్రిల్ నెలాఖరులో ఎంఎస్ఎంఈ ( మైక్రో , స్మాల్ అండ్ మీడియం ఎంటర్ప్రైజెస్ ) సుస్థిర సర్టిఫికేషన్ పథకాన్ని ప్రారంభించింది .
* ఈ పథకం సూక్ష్మ , చిన్న , మధ్య తరహా పరిశ్రమలన్నీ తాము తయారు చేసే ఉత్పత్తులలో ఎలాంటి లోపాలు , ప్రతికూల ప్రభావాలు లేకుండా ( జీరో డిఫెక్ట్ , జీరో ఎఫెక్ట్ లేదా జెడ్ స్ఈడీ ) ఉండే పద్ధతులను అనుసరించేలా చేసేందుకు సహాయపడుతుంది . అంతే కాకుండా ఈ సర్టిఫికేషన్ పొందేందుకు పరిశ్రమలకు ప్రోత్సాహకాలు అందించి వాటికి ఈ అంశంలో ఛాంపియన్లుగా గుర్తింపు లభించేలా చేస్తుంది .
* సూక్ష్మ , చిన్న , మధ్య తరహా పరిశ్రమలు ఈ సర్టిఫికేషన్ పొందడానికి మూడు స్థాయిలలో పని చేయవలసి ఉంటుంది .
సర్టిఫికేషన్ స్థాయి ::
1. కాంస్య పతకం సర్టిఫికేషన్ స్థాయి
2. రజత పతకం సర్టిఫికేషన్ స్థాయి
3. స్వర్ణ పతకం
* ఏ విధమైన లోపాలు , ప్రతికూల ప్రభావాలు లేకుండా ఉత్పత్తి చేస్తామని ప్రతిజ్ఞ తీసుకున్న తర్వాత ఆ పరిశ్రమలు ఈ సర్టిఫికేషన్ స్థాయిల కోసం దరఖాస్తు చేసు కోవచ్చు . ప్రతి స్థాయిలోనూ పేర్కొన్న అర్హతలను సాధించినట్లు నిరూపించగలిగితే లేదా సాధించగలమనే నమ్మకం కలిగితే ఆ స్థాయిలకు దరఖాస్తు చేసుకోవచ్చు . సూక్ష్మ , చిన్న , మధ్యతరహా పరిశ్రమలు తమ ఉత్పత్తి కార్యకలాపాలలో రకమైన లోపాలు , ప్రతికూల ప్రభావాలు లేకుండా విలువలను కాపాడతామని తమకు తాము నిర్ణయించుకోవడమే ఈ ప్రతిజ్ఞకు వెనుక అసలు కారణం .
* ఈ పథకం కింద సూక్ష్మ , చిన్న , మధ్య తరహా పరిశ్రమలు సర్టిఫికేషన్ పొందితే కొన్ని రకాల సబ్సిడీలు పొందగలుగుతాయి . ఈ సబ్సిడీలు సూక్ష్మ పరిశ్రమలకు 80 శాతం , చిన్న పరిశ్రమలకు 60 శాతం , మధ్య తరహా పరిశ్రమలకు 50 శాతం లభిస్తాయి .
* ఈ సర్టిఫికేషన్ పథకం కింద సూక్ష్మ , చిన్న , మధ్య తరహా పరిశ్రమలకు వివిధ కన్సల్టెన్సీ సేవలు , తదితరాల కోసం ఐదు లక్షల రూపాయల నిధిని అందుబాటులో ఉంచుతారు . వాటి సాయంతో ఈ సంస్థలు ఏ రకమైన లోపాలు , ప్రతికూల ప్రభావాలు లేకుండా తమ పారిశ్రామిక కార్యకలాపాలను పరిశుభ్రమైన పద్ధతిలో సాగించేలా సాయపడతారు .
* ఇంకా ఈ సర్టిఫికేషన్ కింద వివిధ రాష్ట్రాలు , కేంద్రపాలిత ప్రాంతాలు , ఆర్థిక సం స్థలు అందుబాటులోకి తెచ్చిన ఇతర మినహాయింపులు , ప్రోత్సాహకాలను కూడా ఈ పరిశ్రమలు ఉపయోగించుకోవచ్చు . ' ఎంఎస్ఎంఈ కవచ్ ' పేరుతో కోవిడ్ 19 సహాయ కార్యక్రమం కింద ఉచితంగా సర్టిఫికేషన్ కోసం కూడా దరఖాస్తు చేసుకోవచ్చు .
పథకంలోని అంశాలు ::
* పారిశ్రామిక చైతన్యం కలిగించడం , సంబంధిత కార్యక్రమాల వర్క్ షాపుల నిర్వహణ .
* శిక్షణా కార్యక్రమాలు .
* అంచనా వేయడం , సర్టిఫికేషన్ .
* సమస్యలు తెలుసుకోవడం .
* ప్రయోజనాలు , ప్రోత్సాహకాలు .
* ప్రజా సంబంధాలు , ప్రచారం , ప్రకటనలు , బ్రాండ్ల ప్రచారం .
* డిజిటల్ వేదికలు .
ప్రయోజనాలు ::
* జెడ్ఆస్ఈడీ సర్టిఫికేషన్ పొందడం ద్వారా సూక్ష్మ , చిన్న , మధ్య తరహా పరిశ్రమలు కాలుష్యాన్ని , వ్యర్థాలను బాగా తగ్గించుకుని , ఉత్పాదకత పెంచుకోగలుగుతాయి . వాతావరణ పరమైన చైతన్యాన్ని కూడా మెరుగు పరచుకోగలుగుతాయి . ఇంకా ఇంధనాన్ని ఆదా చేయడం , సహజ వనరులను అవసరమైనంత మేరకే ఉపయోగించుకోవడం , మార్కెట్లు విస్తరించుకోవడం మొదలైన ప్రయోజనాలు పొందగలుగుతాయి .
జీరో డిఫెక్ట్ - జీరో ఎఫెక్ట్ ( జెడ్ ఈడీ ) పథకం ::
* ఈ పథకాన్ని 2016 వ సంవత్సరంలో సూక్ష్మ , చిన్న , మధ్య తరహా పరిశ్రమల మంత్రిత్వ శాఖ ప్రారంభించింది . ఇది సమగ్ర , సమీకృత సర్టిఫికేషన్ వ్యవస్థతో కూడిన పథకం .
* దీని ద్వారా సూక్ష్మ , చిన్న , మధ్య తరహా పరిశ్రమల ఉత్పాదకత పెరగడం ; ప్రమాణాలు మెరుగు పడటం ; కాలుష్యం తగ్గడం ; ఇంధన సామర్థ్యం పెరగడం ; ఆర్థికాభివృద్ధి ; మానవ వనరుల అభివృద్ధి ; సాంకేతికతల స్థాయి పెరగడం ; మేధో సంపత్తి హక్కుల పరిరక్షణ మొదలైనవన్నీ సాధ్యపడతాయి . భారత్లో జెడీ సంస్కృతి అభివృద్ధి చేయడానికి , అమలు చేయడానికి దీన్ని ప్రవేశపెట్టారు .
* జీరో డిఫెక్ట్ అంటే ఏ విధమైన లోపాలు లేకుండా వస్తువులు , సేవలను తయారు చేయడం . దీన్ని వినియోగదారులపై దృష్టి కేంద్రీకరించి రూపొందించారు . అంతే కాకుండా వ్యర్థాలు కూడా చాలా తక్కువగా ఉండే పద్ధతి .
* జీరో ఎఫెక్ట్ అంటే వాయు కాలుష్యం , జల కాలుష్యం , ఘన పదార్థాల కాలుష్యం వీలైనంత తక్కువగా ఉండేలా చూడడం . అంతే కాకుండా సహజ వనరుల వృధాను వీలైనంతగా అరికట్టడం . అంటే వాతావరణంపైన , పరిసరాలపైన అతి తక్కువ ప్రభావాలు ఉండేలా చూడడం .
* సూక్ష్మ , చిన్న , మధ్య తరహా పరిశ్రమలలో లోపాలు లేకుండా , పర్యావరణ వ్యవస్థ దెబ్బ తినకుండా ఉత్పత్తి జరిగేలా ఆ వ్యవస్థను అభివృద్ధి చేయడం ఈ పథకం ప్రధాన లక్ష్యం .
* సూక్ష్మ , చిన్న , మధ్య తరహా పరిశ్రమలు మంచి ప్రమాణాలతో కూడిన వస్తువులను ఉత్పత్తి చేయడం ; అందుకోసం మంచి ప్రమాణాలు కలిగిన పరికరాలు , వ్యవస్థలు , ఇంధన సామర్థ్యం కలిగిన పద్ధతులు ఉపయోగించడం ; నిరంతరంగా తమ ఉత్పత్తుల ప్రమాణాలను , వినియోగించే పద్ధతుల ప్రమాణాలను పెంచుకుంటూ కొనసాగేలా చూడడం ఇతర లక్ష్యాలు .
* జెడ్ఆస్ఈడీ సర్టిఫికేషన్ రంగంలో వృత్తి నిపుణులను రూపొందించడం ; మేకిన్ ఇండియా ఉద్యమానికి మద్దతు ఇవ్వడం కూడా ఈ పథకం ఆశయాలు . సూక్ష్మ , చిన్న , మధ్యతరహా పరిశ్రమల రంగాన్ని ప్రోత్సహించేందుకు తీసుకున్న ఇతర చర్యలు...
1. ప్రధానమంత్రి ఉపాధి కల్పనా కార్యక్రమం .
2. సాంప్రదాయక పరిశ్రమల పునర్నిర్మాణ నిధి పథకం .
3. కొత్త ఆవిష్కరణలు , గ్రామీణ పరిశ్రమలు , వ్యాపారాలను ప్రోత్సహించే పథకం .
4. సూక్ష్మ , చిన్న , మధ్య తరహా పరిశ్రమలకు క్రమానుగత రుణాలు అందించి , వడ్డీలు తగ్గించే పథకం .
5. సూక్ష్మ , చిన్న పరిశ్రమలకు రుణ గ్యారెంటీ పథకం .
6. ఛాంపియన్స్ పోర్టల్